tx:Annales Rodenses/1137 LT
Uit KGV
| Onderstaande tekst is een onderdeel uit de Annales Rodenses. Maak gebruik van het menu om andere delen van dit jaarboek van Rolduc te lezen. Het bewerken van de tekst leidt ertoe dat de oorspronkelijke tekst terug wordt gezet. | ||
Handschrift Datering Analist Toelichtingen Restant Voetnoten |
Inleiding 1104 1105 1106 1108 1109 1110 1111 1112 1113 1114 1115 1116 1117 1118 1119 1120 1121 1122 1123 1124 1125 1126 1127 1128 1129 1130 1131 1132 1133 1134 1135 1136 1137 1138 1139 1140 1141 1142 1143 1144 1145 1146 1147 1148 1149 1150 1151 1152 1153 1154 1155 1156 1157 |
Inleiding 1104 1105 1106 1108 1109 1110 1111 1112 1113 1114 1115 1116 1117 1118 1119 1120 1121 1122 1123 1124 1125 1126 1127 1128 1129 1130 1131 1132 1133 1134 1135 1136 1137 1138 1139 1140 1141 1142 1143 1144 1145 1146 1147 1148 1149 1150 1151 1152 1153 1154 1155 1156 1157 |
Anno Dominice incarnationis MCXXXVIIo privatus est Borno vite suffragio, qui tertius fuit abbas huius ecclesie, dignus pia in Domino recordatione. Erat enim simplex et religiosus, devotus in Domino et benivolus et in tantum usquequaque acceptus, ut etiam honoraretur a principibus. Borno primus hic lanea indutus est tunica pro consuetudine; unde modo quasi pro ordine solent eam omnes induere, qui hactenus lineis contenti camiseis fuere.
Expletis ergo exequiis et sepultura Bornonis electus est Iohannes in prelatum et rectorem animarum, antiquus ecclesie huius frater et discipulus, qui in universis probatus et fidelis est inventus; unde in electione eius tanta erat concordia ut ab omnibus nemo penitus dissensisse sit repertus. Iohannes iste Lovaniensis fuit natione, hac in ecclesia longo conversatus tempore, nunquam voluntate deficiens a religione, unde tandem regulari est insignitus benedictione. Presentatus192 igitur episcopo suscepit curam ab illo sed non est consecratus abbatis officio, non quod dignitate esset indignus aut ministerio tantus non sufficeret sacerdos, cum adprime eruditus disciplinis fuisset litteralibus et religiosus valde et modestus et tanta castitatis diligentia fulcitus, ut verbum impudicum non sufferret illius auditus. Sed quidam eorum qui elegerant eum versa vice electionis sue, ceperunt ei, quasi non sufficeret, detrahere negantes ei - si ordinaretur - assistere, et sic debita fraudatus consecratione non est moleste compertus hoc tulisse ne gloriari velle videretur dignitate.
Comparata interim Iohannes valle, que nunc appellatur Sancte Marie, constituit operarios negotio insistere, qui magna congerie lapidum et terre impleta torrentis cavitate et conplanata paulatim superficie posuerunt fundamentum ecclesie et ceperunt edificare et, transacto hinc anno et secundo celebrata est ibi missa in tertio, id est incarnationis Domini MCXXXVIIIo. Tunc plantabant vineam in clivo montis occidui ab occidente septis inminenti ex iure civilitatis huius ecclesie, quam ipsa ex curtis potestate aput meinscozen quondam site habet etiam in territorio illius parrochie.
His diebus emit Iohannes septem iugera terre a quodam pictore Heriberto nomine, que sita sunt ultra Crumbach a curte versus affricum, ubi termini de Ritherche et de Simplevei habent confinium, infra Ritherecensis parrochie terminum; unde duo iugera solvunt duos denarios Ritherecensi ecclesie et sic libera est terra cenobii huius absque decimarum iure.\r\nHezelo de Rucelenfelt, qui ministerialis fuit Heinrici ecclesie huius advocati, cuius etiam propria erat terra aput Affethen et Rucelenfelt sita, dedit ecclesie sedecim iugera terre facta ab eodem Heinrico altari traditione, et inita cum fratribus Hescelo predictus professione insignitus est commanendi habitudine.
Eodem anno emit Iohannes mansum terre ab Hariberto pontifice Traiectensis ecclesie, qui situs est aput Salcwich iuxta eum videlicet mansum, quem proximo hinc retro anno dedit etiam ecclesie Gozwinus, predicti Harberti filius, hic inter fratres consignatus et litterarum officio educatus.
Hoc eodem anno obiit Bruno, archiepiscopus Coloniensis, in expeditione Lotharii imperatoris, cui Hugo ibidem subrogatus ab Innocentio est consecratus sed vicesimo septimo die morte periit, cui Arnoldus quoque successit. Deinde Lotharius in confinio Alpium moritur et sic ad terram suam reportatur.