tx:Annales Rodenses/1152 LT
Uit KGV
| Onderstaande tekst is een onderdeel uit de Annales Rodenses. Maak gebruik van het menu om andere delen van dit jaarboek van Rolduc te lezen. Het bewerken van de tekst leidt ertoe dat de oorspronkelijke tekst terug wordt gezet. | ||
Handschrift Datering Analist Toelichtingen Restant Voetnoten |
Inleiding 1104 1105 1106 1108 1109 1110 1111 1112 1113 1114 1115 1116 1117 1118 1119 1120 1121 1122 1123 1124 1125 1126 1127 1128 1129 1130 1131 1132 1133 1134 1135 1136 1137 1138 1139 1140 1141 1142 1143 1144 1145 1146 1147 1148 1149 1150 1151 1152 1153 1154 1155 1156 1157 |
Inleiding 1104 1105 1106 1108 1109 1110 1111 1112 1113 1114 1115 1116 1117 1118 1119 1120 1121 1122 1123 1124 1125 1126 1127 1128 1129 1130 1131 1132 1133 1134 1135 1136 1137 1138 1139 1140 1141 1142 1143 1144 1145 1146 1147 1148 1149 1150 1151 1152 1153 1154 1155 1156 1157 |
Anno Dominice incarnationis MCLIIo comparavit abbas mansum a provisoribus ecclesie Vallis Sancte Marie, quamvis idem mansus magis huius ecclesie constet proprius fuisse. Nam transpositis illuc sororibus concessa sunt eis allodia quedam sola stipendiorum ratione, quorum tamen proprietas remansit huius ecclesie, sicut et illa pariter ecclesia est etiam huius propria respectu obedientie. Mansus iste situs est aput Gudolfrothe et solvit septem solidos et quatuor denarios Coloniensis monete.
His diebus habuit ecclesia Floreffiensis209 aput Hoinge in aspectu Colonie capellam inibi sitam et curtim unam et mansum integrum et arbusta quasi novem iugerum. Hec profecto emit abbas ab abbate et fratribus illius ecclesie et facta inter se mutua contaxatione appendit illis argentum et ipsi assignaverunt nobis capellam et allodium. Argentum quo empta est curtis, que nuncupatur Hoynge, dedit ecclesie clericus Traiectensis nomine Udelricus et alia quamplurima dedit sororibus in Scarnia. Septimo idus decembris obiit Udelricus diaconus. Gunthardus de Rothe, Gunthardi pater, cuius feodum erant duo inferiores mansi aput Hagenrothe, dedit inde decimas ecclesie cum filia nomine Benedicta, que sic inter sorores est collocata, facta inde altari traditione ab Heinrico, allodii possessore. Decime autem iste sunt tantummodo agriculture et de feni collectione.
Eodem anno factum est miraculum grande aput Bastwilre mutato ibi in sanguinem lacu aque. Nam combusta ante biennium ecclesia erat hoc anno restauranda, ubi deficiente ad cementum aqua petierunt eam a villano, in cuius lacu habebatur abundantia. Quam cum ille operi ecclesie denegaret, mane facto die altero inventus est omnino lacus in sanguinem conversus. Unde ut tale et tantum etiam posteris miraculum possit apparere, illinitus est murus ecclesie ab eodem sanguine.
Mortuus est Conradus rex Romanorum, non consecratus in Augustum, cui successit Fridericus, Friderici210 fratris Conradi regis filius. Anfridus, Anfridi filius de Thudre, defunctus est in castro et hoc in loco sepultus; pro cuius anima dederunt ecclesie fratres eius curtim aput Haren, que solvit quatuordecim denarios.
Gozwinus de Wassenberch, qui dictus est Lutzo, dedit ecclesie quasi dimidium mansum terre tali videlicet significatione ut, quamdiu vivit, ipse potiatur inde victualitatis iure sed eo vita subtracto cedat libere terra hec ecclesie. Ipse vero solvit interim inde sex denarios ecclesie. Traditio huius terre facta est ab Heinrico, illius domino, nostro autem advocato. Terra hec sita est aput Dihtelrode et solvit sex solidos et totidem denarios Coloniensis monete.